我就是活在這個沒有耳、沒有心的世代

＜例一＞ 卑人：喂，你好呀，我姓黃架。我想問一下有關… 各大客戶服務電話熱線職員：哦，小姐，你貴姓呀？ ＜例二＞ 於某燒味茶餐廳。一位貎似八、九十後的伙計與我朋友的對話。　 朋友甲：請問有無乳豬呀？ 伙計：無呀，有燒肉囉。 朋友甲：咁係咪賣晒呀？（其實朋友想確認一下這燒味茶餐廳是不是沒有乳豬售賣） 伙計：得燒肉咋。（朋友甲此時頭頂已冒煙。） 卑人：（終於按捺不住）咁你鋪頭本身係無乳豬賣丫，定係只係得燒肉賣呀？ 伙計：哦！我地係得燒肉賣架咋！ ＜例三＞ 與朋友通電話。 卑人：在哪？ 朋友乙：在吃飯。 究竟是我表達能力有問題，還是對方的接收能力有問題？我發現現世代的人往往不能分柝所接收的訊息，是不是那一部份大腦的功能經已退化？而當我跟這些人溝通的時候，間接令我學懂設定問題而令他們不用怎樣花太多心思去作答。當然這並不等於他人會有能力回答你的問題，但至少這是一個不錯的鍛鍊令到自己思考而不會給予別人「唔經大腦」的感覺。 ＜例四＞ 朋友在電話另一端聽到我悶悶不樂，無精打彩，便提議約出來面談。跟朋友訴說近來不太順心，到最後：「車！你有幾慘啫？我仲慘啦！」 我不太明白為何他要跟我比痛苦。若你痛苦的話，那我又不痛苦嗎？明明是我悶悶不樂，你要我跟你訴苦，到頭來要承受你的痛苦。那我豈不是要承受你的負能量而百上加斤？若你本來已很痛苦的話，是不應該找我跟你一起沉下去的，你需要的是正能量！而不是有人跟你較量誰比較痛苦。　 所以，如非必要的話，我經已少跟這類人接觸。因為他們永遠也不會快樂；因為他們不知足。這類人見到別人快樂，他不會為別人高興。最重要的是他們不明白快樂本質是出於自身，而不是別人能夠隨便施予。就算香港政府派發六千大元也好，這些人總會有一大堆說話：「咁少！？都不夠我買手袋啦！」、「出年先派我可能死左都唔定囉！」「派比啲阿公阿婆先？有無攪錯呀？一陣一派完佢地就瓜咁咪益晒佢地啲仔女囉？政府都唔諗野嘅！」 唉… 然而這些人總圍在大家身邊在存活著。 我想這些人的生存目的是「若看到別人折墮，我就會比較好過」。 來自細彪結界：http://cybillwong.wordpress.com

Read Full Post »

屎坑點燈－找屎（死）！

尋日某寬頻電視有條友打黎，佢用機關槍式講野方法掃左我最少 15 分鐘；內容大致係話我加 HK$156 簽 24 個月約就可以係房裝多個盒同埋送部電視機。其中一個最好笑嘅對話係：－ 卑人：我想問個電視機幾大呀? Sales：哦, 係一部 18 吋嘅 Samsung Digital Mon 黎架! 可以駁電腦又得, 睇高清電視都得架! 卑人：嗯… 18 吋呀…（正沉思緊係咪應該要洗呢啲錢，同埋有無地方放咁多野係房－其實都有啲心動，因為我想裝部電視係房想左好耐，而佢又可以駁到電腦嘅就即頭 perfect 到爆啦！） Sales: 黃小姐？你唔洗驚喎！部18吋電視呢睇落去唔似18吋架！ 卑人: 下？ Sales: 睇落去會再大啲架！ 卑人：=..=（呢條友想點！？） 咁究竟 18 吋電視點樣先可以睇到唔似18 吋電視呢？莫非你把尺同我把尺又唔一樣嘅？你用火星十進制？ 總結：我真係對呢個 Plan 好有興趣，但係我唔想幫一個咁唔 Logic 嘅 Sales 買呢個 Service… 同埋佢掃到我係個電話過程裡面我共總叫左佢起碼十次“可唔可以講慢啲!?” 來自細彪結界：http://cybillwong.wordpress.com

Read Full Post »